స్పెల్లింగ్ బీ విజేతగా భారత సంతతి విద్యార్థి

అమెరికాలో జరిగిన ప్రతిష్టాత్మక 'స్క్రిప్స్ స్పెల్లింగ్ బీ' పోటీలో 14 ఏళ్ల భారతీయ అమెరికన్ విద్యార్థి శ్రేయ్ పారిఖ్ విజేతగా నిలిచాడు. కేవలం 90 సెకన్లలో 32 పదాలకు సరైన అక్షరక్రమం చెప్పి సరికొత్త రికార్డు సృష్టించాడు. ఈ పోటీలో మొదటి మూడు స్థానాలూ భారత సంతతి విద్యార్థులకే దక్కడం విశేషం. కాలిఫోర్నియాకు చెందిన శ్రేయ్‌కు రూ.41 లక్షలకు పైగా నగదు బహుమతి, స్క్రిప్స్ కప్ లభించాయి. 1925 నుంచి జరుగుతున్న ఈ పోటీల ఫైనల్‌కు చేరిన తొమ్మిది మందిలో ఐదుగురు భారత మూలాలున్నవారే కావడం గమనార్హం.