నకిలీ ఫోన్‌పే యాప్‌ మోసం: ముఠా అరెస్ట్

హైదరాబాద్‌లో నకిలీ డిజిటల్‌ చెల్లింపుల యాప్‌తో వ్యాపారులను వంచిస్తున్న ఆరుగురి ముఠాను కంచన్‌బాగ్ పోలీసులు శనివారం అరెస్ట్ చేశారు. బక్రీద్‌ విక్రయాల నేపథ్యంలో ఒక గొర్రెల వ్యాపారికి తప్పుడు రసీదు చూపించి, నగదు చెల్లించకుండా ఐదు గొర్రెలతో పరారైనట్లు వీరిపై కేసు నమోదైంది. ఖాతాలో డబ్బులు జమకాకపోవడంతో మోసపోయానని గ్రహించిన బాధితుడు పోలీసులను ఆశ్రయించాడు. సీసీటీవీ కెమెరాల ఆధారంగా దర్యాప్తు చేపట్టిన అధికారులు, ఇద్దరు మైనర్లతో సహా నిందితులను పట్టుకుని వారి నుంచి వాహనాలు, మొబైళ్లను స్వాధీనం చేసుకున్నారు.