జమ్మూకశ్మీర్‌లో భారీ వర్షాల కారణంగా 10 మంది మృతి

జమ్మూకశ్మీర్‌లోని రాజౌరీ, పూంచ్ జిల్లాల్లో శనివారం రాత్రి కురిసిన భారీ వర్షాలు తీవ్ర విధ్వంసాన్ని సృష్టించాయి. అకస్మాత్తుగా సంభవించిన మెరుపు వరదల ధాటికి ఇప్పటివరకు 10 మంది మృతిచెందగా, పలువురు తీవ్రంగా గాయపడ్డారు. నదులు పొంగిపొర్లడంతో రాజౌరీలోని కొత్త బస్టాండ్ నీటమునిగి, అనేక వాహనాలు కొట్టుకుపోయాయి. దార్హాలి నది రక్షణ గోడ ధ్వంసమై, అబ్దుల్లా బ్రిడ్జి సమీపంలోని 50కి పైగా కుటుంబాలను అధికారులు సురక్షిత ప్రాంతాలకు తరలించారు. పూంచ్ జిల్లాలో కొండచరియలు విరిగిపడటంతో సహాయక చర్యలు ముమ్మరం చేశారు. పరిస్థితిని ఎప్పటికప్పుడు పర్యవేక్షిస్తున్నామని సీఎం ఒమర్ అబ్దుల్లా ప్రకటించగా, జులై 23 వరకు భారీ వర్షాలు కురిసే అవకాశం ఉందని వాతావరణ శాఖ హెచ్చరించింది.