అమరావతి.. అఖండ దీప్తి: నవ్యాంధ్ర రాజధాని నిర్మాణంలో మరో చారిత్రక ఘట్టం.

ఆంధ్రప్రదేశ్ రాజధానిగా అమరావతికి చట్టబద్ధత కల్పించే పునర్విభజన సవరణ బిల్లును రాజ్యసభ మూజువాణి ఓటుతో ఆమోదించింది. లోక్‌సభ ఆమోదం తర్వాత జరిగిన ఈ చర్చలో 10 పార్టీలకు చెందిన 16 మంది సభ్యులు బిల్లుకు పూర్తి మద్దతు ప్రకటించారు. భవిష్యత్తులో ఏ ప్రభుత్వం కూడా రాజధాని విషయంలో ప్రజాజీవితాలతో ఆడుకోకూడదనే బలమైన సందేశాన్ని ఈ చట్టం ఇచ్చింది. ఉభయ సభల్లో కలిపి మొత్తం 260 నిమిషాల పాటు సాగిన ఈ చర్చలో అమరావతి రైతుల పోరాటాన్ని, ముఖ్యమంత్రి చంద్రబాబు నాయుడు దార్శనికతను సభ్యులు కొనియాడారు. వైకాపా మినహా మిగిలిన అన్ని పార్టీలు అమరావతి నిర్మాణాన్ని స్వాగతించాయి. రాష్ట్రపతి ఆమోదం పొందిన వెంటనే ఈ బిల్లు అధికారికంగా చట్టరూపం దాల్చనుంది.