వరంగల్ పర్యాటక రంగంలో మణిహారం: భద్రకాళి బండ్‌ సుందరీకరణ

వరంగల్ భద్రకాళి బండ్‌ను నగరపాలక సంస్థ ఆధ్వర్యంలో సుందరంగా తీర్చిదిద్దుతున్నారు. స్మార్ట్ సిటీ పథకంలో భాగంగా ఇప్పటికే జాతీయ గుర్తింపు పొందిన ఈ బండ్‌ను, రెండో దశలో సుమారు రూ.35 కోట్లతో కాకతీయ పట్టణాభివృద్ధి సంస్థ (కుడా) అభివృద్ధి చేస్తోంది. పూల వనాలు, కిలోమీటర్ల మేర సింథటిక్ వాకింగ్ ట్రాక్ వంటి అత్యాధునిక వసతులు పర్యాటకులకు కనువిందు చేయనున్నాయి. ఈ ప్రాజెక్టులో భాగంగా భద్రకాళి చెరువులో పూడికతీత పనులు చేపట్టి, ప్రత్యేకంగా 'నక్షత్ర ఐలాండ్'ను ఏర్పాటు చేయనున్నారు. ఆధ్యాత్మికతతో పాటు ఆహ్లాదాన్ని పంచేలా ఈ లేక్ ఫ్రంట్ పనులు వేగంగా జరుగుతున్నాయి. ఇది వరంగల్ నగర పర్యాటక రంగంలో మరో మణిహారంగా నిలవనుంది.