తిరుపతిలో హైటెక్ బస్ టెర్మినల్! 10 అంతస్తులు.. సకల సౌకర్యాలతో కొత్త లుక్.

తిరుపతిలో రూ. 470 కోట్ల అంచనా వ్యయంతో నిర్మించనున్న అత్యాధునిక 'ఇంటర్‌ మోడల్ బస్ టెర్మినల్' కోసం ఈపీసీ (EPC) విధానం ఉత్తమమని ఎన్‌హెచ్‌ఎల్‌ఎంఎల్‌ ప్రతిపాదించింది. 13.18 ఎకరాల్లో 10 అంతస్తులతో నిర్మించే ఈ భారీ ప్రాజెక్టులో రైల్వే స్టేషన్, తిరుమల ప్రయాణికులకు అంతర్జాతీయ స్థాయి మౌలిక సదుపాయాలు కల్పించనున్నారు. ఈ టెర్మినల్‌లో రెండు అంతస్తుల సెల్లార్ పార్కింగ్‌తో పాటు 10.45 లక్షల చదరపు అడుగుల నిర్మిత ప్రాంతం ఉంటుంది. వాణిజ్య అవసరాల కోసం ప్రత్యేకంగా 4.29 ఎకరాలను అభివృద్ధి చేయనుండగా, రవాణా సౌలభ్యం కోసం ఫ్లైఓవర్ కూడా నిర్మించనున్నారు. భక్తుల రద్దీకి అనుగుణంగా సకల సౌకర్యాలతో ఈ ప్రాజెక్టును తీర్చిదిద్దనున్నారు.