పాత పెట్టుబడులకు పన్ను మినహాయింపు: సీబీడీటీ కీలక స్పష్టీకరణ

2017 ఏప్రిల్ 1 కంటే ముందు చేసిన పాత పెట్టుబడుల బదిలీపై వచ్చే ఆదాయానికి ‘గార్’ (జనరల్ యాంటీ అవాయిడెన్స్ రూల్స్) నిబంధనలు వర్తించవని కేంద్ర ప్రత్యక్ష పన్నుల బోర్డు (సీబీడీటీ) స్పష్టం చేసింది. ఆదాయపు పన్ను నిబంధనలు-2026లో చేసిన ఈ సవరణతో పరిశ్రమ వర్గాల్లో ఉన్న దీర్ఘకాలిక ఆందోళనలు తొలగిపోయాయి. పన్ను ఎగవేతలను అరికట్టేందుకు తీసుకొచ్చిన ‘గార్’ నిబంధనల నుంచి పాత పెట్టుబడులకు పూర్తి మినహాయింపు లభించింది. ఈ నిర్ణయం వల్ల విదేశీ మదుపర్లకు స్పష్టత రావడంతో పాటు పెట్టుబడిదారులలో భరోసా పెరుగుతుందని నిపుణులు అభిప్రాయపడుతున్నారు. దీనివల్ల పాత లావాదేవీలపై పన్ను భారం పడకుండా ఉపశమనం లభించనుంది.