తిరుమలలో ఏప్రిల్ 25 నుంచి శ్రీ పద్మావతి పరిణయోత్సవాలు; మూడు రోజుల పాటు వాహన సేవలు, ఆర్జిత సేవలు రద్దు.

తిరుమలలో ఏప్రిల్ 25 నుండి 27 వరకు శ్రీ పద్మావతి పరిణయోత్సవాలు వైభవంగా జరగనున్నాయి. నారాయణగిరి ఉద్యానవనాల్లో నిర్వహించే ఈ మూడు రోజుల వేడుకల్లో మలయప్పస్వామి గజ, అశ్వ, గరుడ వాహనాలపై భక్తులకు దర్శనమివ్వనున్నారు. ఈ ఉత్సవాల సందర్భంగా ఆర్జిత బ్రహ్మోత్సవం, సహస్ర దీపాలంకార సేవలను తితిదే రద్దు చేసింది. కల్యాణ మహోత్సవం అనంతరం స్వామివారు, ఉభయ నాంచారులు ప్రత్యేక పల్లకీలలో ఊరేగుతూ భక్తులను అనుగ్రహిస్తారని ఆలయ అధికారులు వెల్లడించారు.