ఆదాయపు పన్ను అప్పీళ్ల పరిష్కారంలో వేగం; గత ఏడాది 2.22 లక్షల వివాదాలను ముగించిన సీబీడీటీ.

ఆదాయపు పన్ను వివాదాల పరిష్కారంలో కేంద్ర ప్రత్యక్ష పన్నుల బోర్డు (CBDT) వేగం పెంచింది. గత ఆర్థిక సంవత్సరంలో రికార్డు స్థాయిలో 2.22 లక్షల అప్పీళ్లను పరిష్కరించి, అంతకుముందు ఏడాదితో పోలిస్తే 29 శాతం వృద్ధిని నమోదు చేసింది. పన్ను ఎగవేతలను అరికట్టేందుకు డిజిటల్ నిఘా, గణాంకాల విశ్లేషణను పటిష్టం చేస్తున్నట్లు సీబీడీటీ ఛైర్మన్ రవి అగర్వాల్ తెలిపారు. కొత్త ఆదాయపు పన్ను చట్టం-2025 అమల్లోకి రానున్న నేపథ్యంలో, వ్యవస్థలో మరింత పారదర్శకత, సామర్థ్యం పెరుగుతాయని ఆయన ఆశాభావం వ్యక్తం చేశారు.